नाशिक : प्रतिनिधी
सिडकोतील अश्विननगर येथील सेंट लॉरेन्स हायस्कूल व ज्युनिअर कॉलेजमध्ये मानवाधिकार दिन उत्साहात साजरा झाला. याप्रसंगी विद्यार्थ्यांनी पथनाट्य सादर केले. कार्यक्रमाच्या अध्यक्षस्थानी शाळेच्या संस्थापिका सुमन दत्ता होत्या.
अधिकारांचे महत्त्व विषद
संगीत शिक्षक संदीप थाटसिंगर यांनी रचलेले गीत इयत्ता आठवीच्या विद्यार्थांनी गायले. विद्यार्थी ऋग्वेद वाघ याने मानवी अधिकारांचे महत्त्व सांगितले. इयत्ता सहावीची विद्यार्थिनी मयुरी भगत हिने स्वरचित कविता प्रस्तुत केली.
पथनाट्याद्वारे जागृती कार्यक्रमाची सांगता पथनाट्याद्वारे झाली. या पथनाट्यात इयत्ता आठवीच्या विद्यार्थ्यांनी भाग घेतला. आपण सर्वजण समान आहोत. आपल्याला संविधानाने समान हक्क वा अधिकार दिलेले आहेत. त्यांचे आपण पालन केले पाहिजे, अशा पद्धतीने भेदभावरहीत समाज निर्माण करण्यासाठी या पथनाट्याद्वारे जागृती करण्यात आली.
विद्यार्थी प्राची नाईक व राज उफाडे यांनी सूत्रसंचालन केले. या कार्यक्रमासाठी शाळेच्या मुख्याध्यापिकांचे मार्गदर्शन लाभले.
